السلام عليكم ورحمة الله وبركاته نتقاسم معاكم العجين المعتمد عندي في بيتزا ماكنغيروش كيجي رائع وخفيف وبنين ماتشبعوش منو وكل مرة كنغير غير في الحشوة نتمنى يروقكم
مقادير الحشوة طبعا تبقى حسب الرغبة والمتوفر يعني يمكن لكم تعملو طريفات ً الدجاج أو كويرات الكفتة أو التون يعني نتما والاختيار ديالكم انا اول مرة عملتها بالصلصة البيضاء والصوصيص وماتقولش لكم مداق رائع أولا قطعت 2 حبات بصل لشرائح رقيقة سخنت مقلاة عملت فيها معلقة صغيرة الزبدة وضفت البصل وبقيت كنحرك في الخليط حتى يدبل البصل ضفت شوية الملح والفلفل الأسود وزولتهم من النار وخليتهم على جانب بالنسبة لصوصيص عملتو في الفرن يطيب من بعد قطعتو لقطع صغيرة أما الصلصة البيضاء عملت معلقة كبيرة زبدة في ايناء حتى تبدى دوب ضفت 2 حبات فرماج مثلث ثم معلقة كبيرة مايزينا ثم نصف كأس حليب ومزجت الخليط جيدا وبقيت نحرك مزيان حتى يصبح الخليط متماسك ضفت عليه قليل من الملح والفلفل الأسود وزولتو من النارمقادير العجين 500غ دقيق ابيض + 125غ دقيق الفينو + ملعقة كبيرة سكر + 2 معالق كبار حليب بودر + ملعقة صغيرة اوريجانو + رأس ملعقة صغيرة بودر ثومة + ملعقة صغيرة ملح + قليل من الفلفل الأسود + ملعقة صغيرة عامرة خميرة الخبزحبوب اي خميرة فورية + ملعقة كبيرة زبدة لينة +الماء الدافئ حسب الخليط
الطريقة نخلط النواشف مع بعض يعني دقيق مع الفينو وحليب بودر والملح والسكر والابزار والاوريجانو وبودر الثوم والخميرة ونضيف الماء بالتدريج حتى الحصول على عجينة رطبة تدلك لمدة 5 دقائق ثم نضيف ملعقة الزبدة وتدلك حتى تختفي ويتشرب العجين الزبدة بأكملها تدهن بالزيت ونتركها تختمر لمدة نصف ساعة بعد ذلك نخرج منها الهواء ونرش سطح العمل بالفينو ونقسمه إلى قسمين متساويين خديت الكرة الاولى مددتها بالنشابة مع الرش بقليل من الفينو حتى لا تلتصق وعملتها في صينية البيتزا ومددتها حتى يصبح العجين رقيق وعملت ثقوب بواسطة فورشيط وقطعت فروماج موتزاريلا لشرائح رقيقة وطويلة وعملتهم في جانب العجين وقفلت عليهم ودخلت بيتزا ديالي لفرن مسخناه من قبل على درجة حرارة 200 لمدة 7 دقايق خرجتها وعملت فوقها الصلصة البيضاء ثم شرائح البصل ثم الصوصيص وقليل من الزيتون المقطع لدوائر ودخلتها لفرن وخليتها طيب على درجة حرارة متوسطة بعد النضوج خرجتها رشيت عليها الفروماج المبشور ودخلتها 2 دقائق حتى يدوب الفروماج والقسم المتبقي من العجين سرحت و قطعتو بمرشم دائري وعملت بيتزات صغار والحشوة حسب الرغبة والمتوفر وبصحة والراحة.
